Mae canlyniad y bleidlais ar-lein i benderfynu beth y dylai un o bwyllgorau'r Cynulliad Cenedlaethol gynnal ymchwiliad iddo wedi'i gyhoeddi.
Gofynnodd Pwyllgor Diwylliant, y Gymraeg a Chyfathrebu i'r cyhoedd ddewis pa bwnc y dylai ei ystyried ar ôl cael nifer o syniadau yn ystod yr ymgynghoriad a gynhaliwyd dros yr haf.
Gofynnwyd i bobl ddewis o blith y pynciau isod:
- Cryfhau cyfranogiad dinasyddion a mynediad at wleidyddiaeth yng Nghymru;
- Gwarchod treftadaeth ddiwylliannol leol yng Nghymru;
- Y modd y caiff hanes ei ddysgu yng Nghymru, gan ganolbwyntio ar ddiwylliant a threftadaeth Cymru;
- Datblygu a hyrwyddo 'brand Cymru';
- Adolygiad Llywodraeth Cymru o amgueddfeydd yng Nghymru;
- Cefnogi a datblygu mathau unigryw a thraddodiadol o gelfyddyd yng Nghymru;
- Mynediad at y celfyddydau ar lawr gwlad, a'r drefn gyllido;
- Cefnogi'r rhai sy'n gweithio ym maes celfyddydau gweledol a chymhwysol yng Nghymru, a sicrhau eu bod yn datblygu;
- Datblygu'r diwydiant cerddoriaeth yng Nghymru;
- Chymorth dwyieithog i bobl fyddar a thrwm eu clyw a phobl sydd ag anawsterau cyfathrebu.
Pleidleisiodd tua 2,700 o bobl. Roedd un o bob pum pleidlais ar gyfer yr un pwnc, gan sicrhau enillydd clir. Felly, heb oedi rhagor, dyma gyhoeddi mai'r pwnc y bydd Pwyllgor Diwylliant, y Gymraeg a Chyfathrebu yn ei ystyried cyllido yw addysg cerddoriaeth.
“Diolch i bawb a gymerodd ran yn ein pleidlais,” meddai Bethan Jenkins AC, Cadeirydd y Pwyllgor.
“Clywsom gymaint o syniadau da ar gyfer pynciau y gallem edrych arnynt, roeddem ni'n teimlo mai'r peth iawn oedd rhoi'r cyfle i'r cyhoedd ddewis pa un y dylem ganolbwyntio arno.
“Cerddoriaeth ym maes addysg oedd yr enillydd clir. Bydd y Pwyllgor yn trafod yn y flwyddyn newydd sut i fwrw ymlaen â'r ymchwiliad.”